Pages

2008年1月28日 星期一

天氣寒冷下的高脂物體小老婆

近日天氣下降, 我地的家身處屯門就更加凍

而小老婆除住天氣的轉變, 生活都唔同咗


基本上星期六晚開始就係被兜中過活,

小老婆朝早當然係有咁遲得咁遲先起身啦

其實大約9點佢已經醒咗, 不過太凍之下又訓過, 訓到11點幾先起身

大約1點幾我地出去食下午茶, 行咗陣街, 4點就返屋企啦

番到屋企上咗一陣網又"捐"落去被兜, 又訓到6點,


之後佢連人帶被兜, 坐咗係到上網, 簡直嘆為覲止


食完飯之後, 佢又"捐"番落被兜睇哥師奶大結局

直到訓覺前基本上都冇離開過被兜既


而我呢都有轉變架, 為避免夜晚冇哂d被,

一早已經用定救命被*, 咁凍的天氣下


當我識凍的時候先用已經太遲, 已經病咗囉




* 救命被故名思義用嚟救命啦, 係當我被老婆搶哂d被

勁凍又冇被過時用的, 好重要架


2008年1月23日 星期三

海南雞飯大比併

今日去我公司後面新開張的泰國人海南雞試吓

當然要話比大家知間野得唔得啦!

不過順便搵多2間都係出名海南雞的餐廳同佢比一比

比併對手

1)  三巡海南雞飯 ~ 係東涌的foodcourt, 開張半年左右

2) 泰國人海南雞 ~ 係好多地方都有, 最新開張的係元朗分店

3) 南亞餐廳 ~ 舊鋪係美孚, 新鋪係荃灣, 我老豆後生個時已經幫襯佢

Round  One: 先比吓個湯

第一位: 南亞

基本上贏9條街, 因為係真正的雞湯, 用的應該係鮮雞同雞內臟

所以味道特別出








不過以家d湯好似差咗d

唔知係唔係用咗冰鮮雞呢


第二位: 三巡

好飲的味精湯, 不過原全唔知係雞湯定係豬骨湯啦



第三位: 泰國人

好難飲的味精湯, 飲咗兩啖就冇飲啦





second round: 海南雞

第一位: 三巡


d雞滑到妳唔信, 唔係講雞比肉喎, 我講既係雞胸肉喎

不過講到雞味就差d啦, 叫仲有dd雞味啦, 不過佢既豉油就幾特別

非常濃且香, 但並不鹹, 應該係貴野





第二位: 南亞

講滑佢又唔夠滑, 講雞味 ~ 雖然都係三間之冠, 不過都係唔夠雞味

講醬汁都係一般野, 冇咩特別! 係冇咩特別差又冇咩特別好之下

排第二都好應該





第三位: 泰國人

d雞又係唔多滑, 雞味就係欠奉啦, 雞毛就大把, 同事就話d醬汁好食

我就一d都唔覺啦







last round: 雞油飯 (我覺得雞油飯係海南雞飯的靈魂,
                                         有次食海南雞飯竟然冇雞油飯食,
                                          俾個白飯我喎, 即時冇哂mood)

第一位: 南亞

每次我都會將成碗飯食哂, 就知有幾好食啦, 基本上我未搵到第二間

d油飯好食過佢


第二位: 三巡

其實都唔係好記得d油飯好唔好味, 不過唔好食的野我一定記得

如果我唔記得證明佢衰極有限


又係最差: 泰國人

d飯再好味都冇用, d米竟然仲係生既, 唔駛講啦


總結: 其實三巡同南亞真係各有各好, 想食靚雞就三巡啦,

想食靚飯就南亞, 至於泰國人就..........bad list



2008年1月10日 星期四

見工電話實況

個案1

x先生: 請問!#%$&xyz 人啊?

高脂: 吓

, 唔好意思聽唔清楚喎, 可唔可以講多次

x先生: 請問你地&%&%係*^x...請人啊?

(都係聽唔到佢講咩, 憑請人兩個字先知佢見工)

高脂:
......係啊! 不過請咗啦
(其實係未請)


x先生:  ( cut 線 ) 勁冇品




個案2

y小姐: 請問妳地公司係唔係搵人啊?

高脂:  搵人? 搵咩人啊
 

y 小姐: 你地公司登咗報紙.....(佢最後都係冇講請人兩個字)

高脂:  唔好意思請咗啦
(其實都係未請到)



家陣市道係唔係真係咁好呢?

個個都出嚟搵工, 不過d人既質素真係差到無倫

連過第一關的能力都冇 (電話預約) 點會做得好份工啊?

唔計預約唔到個d人, 就算上到嚟見工過d都唔好得去邊

唔知係唔係我地公司係元朗的關係呢?

早排請咗個新人都好攪笑

返咗幾日冇啦啦唔見咗人, 電話都冇個, 打俾佢又唔通

之後個日返到嚟佢話阿媽中風入咗院,
所以返唔到工

不過佢一d擔心的表情都冇架喎


好啦! 過咗幾日又唔見咗人啦喎, 又係搵佢唔到佢

過咗兩日終於打返嚟, 話阿媽死鬼埋,
要過兩日先返到工

又信多佢一次啦, 不過之後見佢返工後表情又係好正常架喎


又過咗幾日, 佢又失蹤咗啦喎

今次佢一去不返啦, 連人工都冇追番我地

所以現在我地公司又請人啦


現在以下一段為聘請廣告:

現聘請發票文員一名, 元朗區工作, 人工$6500, 經驗學歷不限

有意者在此留言啦 














2008年1月6日 星期日

上海婆婆

上海婆婆並唔係指高脂係上海有個婆婆
而係一間食上海菜的食店
間野個名雖然好特別, 不過食既野都好大路吓
我地點的菜更係大路中既必選













第一款: 擔擔麵

麵係即拉既, 麵本身相當滑(以這種上海麵來說)但又不是太過軟身喎

湯帶有濃郁的花生味, 不太辣, 因為我叫咗小辣






第二款: 酸辣雲吞

唔知係唔係剛食完濃味的擔擔麵, 總係覺得D湯唔夠味

不過又唔係唔好味喎, 就係再酸一d, 再辣一d


就perfect啦! 而雲吞唔係鮮蝦雲吞, 只係鮮肉雲吞

不過皮相當薄, 都好味啊 




第三款: 小籠包

又係好食, 比上次出名的南翔小籠包更好食, d皮又係薄都死

仲要幾多湯吓, 不過夾上嚟食都唔會爛架喎,高手高手 





總括嚟講高水準, 而且唔係好貴, 食咗3樣野加杯豆漿(超濃豆味)

(加左茶芥&加一)都只係$107, 真係要推介一下


另外今日行屯門有驚人的發現, 就係moviepick的雪糕


仲要係我地只係瑞士見過的開心果味, 不過小老婆

太飽
, 所以下次先去食啦

最近,小老婆食左好多好野!!又係時候要減肥囉!
!
不過.....21/1 book左去尖沙咀帝苑食dinner buffet,
預早同我細佬同阿爸慶祝生日!
而小老婆又發現左帝苑有....

龍島甜品Crossover下午茶自助餐
供應時間及價錢:
星期六、日及公衆假期 3:30pm-5:30pm 成人 $138

高脂
我地幾時去食呀???


2008年1月1日 星期二

2008 年的第一天點過呢?

2008年第一天都算係過得幾充實
而且不失我食家的本色....又去食好野啦


一早11點我地先同d親朋戚友飲茶
地點係利舞台既利寶閣
一入電梯個時有人講: 利寶閣無咩野食架
即時同老婆打個眼色, 心諗: 咁大獲
去到望吓張點心紙真係得個廿多三十款點心
不過好在味道都還算ok
係各親朋戚友妳一句佢一句之下飲

到點幾鐘
之後小老婆話好想買件褸, 不過睇咗幾間都冇心水
最後就去今日最後一站工展會
其實工展會冇咩岩我睇, 如果唔係有個無敵foodcourt
我打死都唔去, 點解?  因為真係超多人囉
今年多人的情況比上年好似更為嚴重

嚴重到我係到諗究竟自己有冇個d咩密室咩閉恐懼症


入咗去人群中, 我會唔會病發既呢?

短短的一條路, 行超過15分鐘先行完
一預所料, 買的全部都係d唔等使既野
我地除咗買了盒餅, 就咩都冇買過啦
去到最後我更係要食番d好野去彌補我
由街頭行到街尾所付出的勞力

今年未發達住, 所以食唔起$400隻鮑魚
想退而求次食$100 4隻鮑魚, 但係一見到隻鮑魚
仲細過手指尾, 即時冇哂興趣
最後我地食咗蟹炒小籠飽$10隻, 一人一隻
超好食, 蟹粉味雖然唔濃, 不過肉同湯的鮮味相當出
我連小老婆流咗出嚟的湯汁都飲埋, 正


之後嚟過碗仔翅, $38 一碗, 不過食落勁多生粉水
仲要係未攪混過種

, 不過我食到真係有兩舊仔真翅架
最後食埋個燕窩蛋撻, 這個都抵食既 $10一個勁多燕窩