去到急症室好彩都唔算多人, 經初步檢查anson後被列為緊急情況, 優先處理
跟住又要睇多次醫生, 不過今次個醫生俾我的印象好差,
腳踩cross 鞋, 一隻腳踏高一隻腳申長, 成個人攤咗係到咁,
心諗醫生嚟架 ? 俾番小小醫生形象嚟好喎~
係個廢柴醫生再次簡單的檢查後anson就去照x-ray啦!
anson又出奇地合作, 一次過就影到張肺片
之後就去另一處等上病房, 不過今次等咗成個鐘, 等到anson都訓咗
上到病房終於有個似樣d既醫生, 作一個詳細d的檢查同抽血
anson都算叻仔, 抽血都係喊咗幾聲, 見番papa之後都冇再喊
我地住既係大房, 不過唔算多人, anson都乖乖地留係床上面休息 (其實係玩)
(圖中既波波係小丑送既)
個晚大約8點幾就訓咗, 不過當然訓得唔好啦~ 因為夜晚好多小朋友入院
整醒咗anson, 而papa亦只係坐係到訓咗兩個鐘,
到第二朝醫生再睇anson, 話佢係最精神既病人仔, 下午肯定可以出院, 咁都安心d
好彩報告出咗, 沒什麼大外, 燒亦都退咗, 只係鼻水仍然長流, 醫院除咗退燒藥之外
就冇其他藥食啦~ 唔通普通傷風可以唔食藥既??
今次入院 papa仲學咗好多病的知識, 例如知道bb抽根點處理(將bb橫臥)
聽到氣喘同哮喘的分別, 尿道炎的病症
亦深深了解到醫院點解咁大開支, 政府醫療點解咁失敗, 醫療失當會咁多~
例如去睇急症肯定可以skip過廢柴醫生個關, 一個病人要用3個醫生去睇
留番d錢俾長流鼻水的病人食吓藥好過啦~
仲有渣lift 阿姐一大班, 炒咗d阿姐買張好d既seat俾家長留過夜好過啦
行行企企student nurse一大群, 但病人氣喘要聞氣咁專業既工作竟然要自己嚟
安排多d實際工作俾student nurse 啦~
會計部準時5點收工, 不過大把人6點先出院, 要第二日番嚟先埋單喎
如果我係大陸人, 點會第二日走番嚟埋單啊, 最後咪合理地走數囉
醫院快d請多d會計啦! 等papa加入廢柴同盟